ही कविता माझ्या लाडक्या लेकीसाठी -


छोट्या छोट्या पावलांनी चाल राणी वाट नवी
छोट्या छोट्या डोळ्यांमध्ये स्वप्नं मात्र मोठी हवी
छोट्या तुझ्या हातांनी ह्या घडव गं नवं जग
ओळख तुझी तिथे फक्त माणूस असेल, एवढं बघ

देवीपण नको तुला, चुकण्याची हवी मुभा
त्यागाचे पोवाडे नको, जगण्याची घ्यावी मजा
घरची तू परी जरी, पंख गरुडाचे तुझे
घे भरारी उंच नभी, पल्याड जा तू क्षितीजाच्या

रेशमी हे केश काळे, नाक जणू चाफेकळी
मदमस्त डोळे नशिले, ओठ गुलाब पाकळी
नव्हेसच तू कवितांमधली, अशी कचकडी बाहुली
शक्ती बुद्धी समृद्धी तू, लक्ष्मी दुर्गा आणि काली

ना तू सखी ना साजणी, ना निर्भया ना दामिनी
ना तू माता नाही जननी, ना प्रिया अन नाही पत्नी
रक्षेसाठी विनवणारी नाहीसच तू अबला भगिनी
गरज तुला ना ह्या बिरुदांची, ओळख असू दे 'व्यक्ती' म्हणूनी
केवळ एक व्यक्ती म्हणूनी...